Huling Programa

Ilang minuto lang naman ako tatayo dito sa harap, kaya kung okay lang sa inyo

Tara usap muna tayo kasi meron lang naman ako gusto ikwento

Gusto ko lang ibahagi itong libro na nadiskubre ko noong taong 2021

Kung saan noong una sa totoo lang, napaisip pa ako anong gagawin ko dito at wala naman itong laman

Oo, aaminin ko

Na noong simula hindi ko naunawaan ang halaga ng aklat na ito

Isang libro na kala mo may mahika

Dahil kada araw bigla bigla nalang nadadagdagan ang sulat sa kada pahina

Mga letra, salita, pangungusap, at talata

Na paiba-iba ang sulat kamay na makikita

Dahil sa kontekstong ito, hindi ako o ikaw ang mambabasa

Ako, ikaw, tayo ang mga manunulat na bumubuo sa storya

Isang storya na matapos ang isang buwan masusulat na ang huling kabanata

Dahil sa susunod na paglipat ng pahina ng kalendaryo magaganap na ang ating huling programa

Isang programa na sinisimbolo pareho ang simula at wakas

Dahil kasabay ng mga pagkakataon na magbubukas

Ang dahan-dahang pagsara ng aklat na natiling bukas ng apat na taon

Oo, talagang malapit na tayo sa linyang tinatawag na konklusyon

Pero hindi naman ibig sabihin na dapat tayo malungkot dahil hindi naman katumbas ng salitang katapusan

Ang karimlan

Kasi oo

Itong libro na pinaghahatian natin ay hindi naman todo polido

Natural lang naman maiwan ang mga marka ng mga salitang burado

Matira ang mga maduduming bakas na tawagin nalang nating bahido

Pero kung ako ang tatanongin niyo, sa bandang huli storya natin ito

Kaya para sakin sapat na iyon para tawagin ito na perpekto

Oo, malapit na tayo sa puntong tinatawag nating katapusan

Para sa storyang tumagal lang ng apat na taon napakarami nating ibat ibang bagay na napagdaan

Kaya bago tuluyan sumara ang mga kurtina at mamatay ang mga ilaw na nagbibigay liwanag sa entablado

Gusto ko lang gamitin ang pagkakataon na ito para sabihin ang mga salitang “nagpapasalamat ako”